Guest Writer 
Apiki na liwat an pamarayaw
Nanlalabitig, magyagid lumakaw
Sano daw la an panahon han biyoos?
Kairas, hingyap ka kun uranos
Mahiyum-hiyom na liwat an mga lahignit
Katam-is gud hinen nga sunit
Kundi ha lamesa nga lipuyok,
Mabutnga an girok
Hain ka na daw la?
Ha dampog ako nasarit na
An imo ganghaw,
Paghihinamuton hasta pumarayaw
Ha kwarto kun diin narungkoy,
Paghigugma mo nga akon pangandoy
Ha dako nga dapit ug haru-harupoy,
Taghom ug iras nga pagduroy
San-o daw la an imo paghangkop?
An huring ug an kupkop
An imo pagpalabi ug pagpa-ura
Pastilan nga gugma malara
San-o kita magsisiniplatay?
An bahandi han sibo sibo-ay
San-o mababati an katamsihan?
Mga huni kun bayhon kakaptan
Sige, ha imo mahulat
Bisan deri na pakabuhat
Hino ka man nga karuha han kasing-kasing
Sunod, aton naman an panaringsing.
