Guest Writer 
Pagpuni-as hinin lamrag nga matulihaw
Waray iba nga biling akon mga mata kundi ikaw,
Mataghom mo nga lambong, dayuday napandong ha akon kada adlaw
Maglipong nga mga butang, imo ako guinpahimangraw,
Ikaw an suna ha akon gab-i nga waray bituon
Boses mo an tambal nga hi ako in magpadayon,
Ha babtuon ko nga dalan ikaw an naaagbay dayon
Pagbuswak han mga bukad hi ako magmalipayon,
Nag-aantos ka pangabkab maghugaw na mga lanod
Masudlan la akon tiyan, pananglitan hingyapon ko diri mautod,
Bisan naabat kana kaguol imo mga tuhod
Sige la duso kay ha Makagarahum dako imo pagtuod,
Kun hi ako guinbibiay-biay hini nga kalibutan
Waray ko iba nga guindadalagnan, nanguyngoy la ha imo dughan,
Nahangkop, harapihap ha taludtod, “Sige anak, igtuok la”
Ngan ganit ha akon balatian imo guinpapara,
Imo burabod na gugma nga diri napapas
Dadad-on ko ngada pagtukog hiton akon lawas,
Bisan ano kadako nga balud ha akon umapas
Padayon papalawod, diri ako maliko ug maiwas,
Hinin larakton ha kinabuhi nga diri harumamay
Imo magrig-on nga sagdon ha akon nakasambay,
Madalugdog nga pitadan, lalakton ko’n tinud-anay
Kay an akon kusog hi ikaw la, akon higugmaon nga nanay.
