Guest Writer 
Naliwat hinmagos an buot han kabudlay
Paturapak ha pagtangis nga sadang igsabaday
Makaluluya, mapagal usahay
Panalagsaon nga deri makalilipay
Mangutngot nga sistema, usa nga pangaraba
Maundang-undang, yakimbot han baba
“Mapaol,” yakan pa niya
“Matuok-tuok,” bul-iw pa han usa
Kalawasan kinakapoy
Mga aragmot, papliton nga pagduroy
Pagpadayon nga usahay makaluluoy
Makatapos nga amo an pangandoy
Mayamuit nga pitaka, tagitis an balon
Nasiplatan an isnakon, niyan nga sura agud sadang unahon
Kun naabat an sirom han kagab-ihon,
Katurugon nga sinasalikway han ginhuhuna-huna nga kabububwason
Tungod nga karuyag makatapos,
Puno hin paglaum, sukot-sukot nga pag-antos
Ha kada hangad ngan pag-ampo nga lain an pulos
Pagpitad nga bulawan an maibabalos
Ha kada kakurian ngan pagpitad,
Panahon danay maupay, usahay malabad
Kun kahulop ngan kalipngaw usahay masagaad
Dumduma ug baliki an ‘karuyag ko magin’ nga imo saad.
