Pasko na Ngay-an?

Alas otso han kagab-ihon han binati ako hin kalumatdan nga nangangaroling ha sawang, ngan tigda nala ako napasasiring “hala pasko nan ngay-an?” Ka paspas man han oras. Pasko na ngay-an, pero kay ano nga hit akon kinabuhi diri paman.

Bzzz… Bzzz… Gin pukaw ako hini nga akon alarm sakto alas sais han ka-agahon. Duha pala ngani ka oras an akon gin katuspok, ma mumuhaypuhay ngan mag aandam na daman para pag sulod ha eskwelahan. Manmimiliw, makarigos, mag sisipilyo, diri na ako makaon kay ig dudungan ko nala it akon pamahaw niyan hit akon paningudto, ma eskwela, mauli, ngan tratrabahoon an iba pa nga karigudigo. Pirahay nala ngani antis mag pasko pero haros sugad la gihap hini an dalagan han akon adlaw. Nanhihimos na unta ako yana ha balay ngan nabulig kan nanay pag andam han salad, pero duro pa it akon igparasa ha akon kamaestrahan, ngan aadi la gihap ako nagsisinibo-sibo hini nga manga deadlines.

Kay pasko man unta, dapat malipayon ako, pero kay ano nga gin aataman ko an akon kasing kasing nga masinulub-on, ngan diri man ako maaram han ugat kun kay-ano sugad. May oras naman nga manarabigay nala an akon tinipasi nga luha hin waray la rason. Ako la ba it sugad hini? An adlaw nga akon gin huhulat hulat han una, yana in mapurot na ha akon pag kita. Akon la paglulurungon it akon kalugaringon kun ako in magsiring nga magrarayhak ako.

Sugad hini an kadak-an nga hugot han mga estudyate, o biskan paman hadto’n diri. Baga baga hin sinako sako nga pinas-an, dara dara yana nga magparasko. Ini in butang nga dre naton ma aakos pagtago ha ilarom hit irok kay dako ini nga kamatuoran. Pero biskan kun sugad man hini an panhitabo nga aton gin tatarap, hinaot unta nga diri mapara an unod nga gin papa samwak hini nga kaadlawon.

Julio Laberon | Senior Layout Artist